मुंबई : केंद्र सरकारच्या पाठोपाठ राज्य सरकारने देखील नागरिकांना दिलासा देत व्हॅटमध्ये सूट जाहीर केली असून यामुळे ग्राहकांना पेट्रोल 2.8 तर डिझेल 1.44 रूपयांनी स्वस्त मिळणार आहे.

केंद्र शासनाने काल पेट्रोल आणि डिझेलचे अबकारी कर कमी केल्यानंतर राज्य शासनाने आज 22 मेपासून पेट्रोल आणि डिझेलवरील मूल्यवर्धित करात ( VAT) अनुक्रमे 2.8 रुपये आणि 1.44 रुपये प्रती लिटर कपात केली आहे. यामुळे वार्षिक सुमारे 2500 कोटी रुपये राज्याच्या तिजोरीवर भार पडणार आहे.

मूल्यवर्धित कर कमी केल्याने पेट्रोलकरिता 80 कोटी रुपये महिन्याला आणि 125 कोटी रुपये डिझेलकरिता इतके महसुली उत्पंन कमी होणार आहे. 16 जून 2020 ते 4 नोव्हेंबर 2021 या कालावधीत केंद्र सरकार पेट्रोल आणि डिझेलवर अनुक्रमे 7 रुपये 69 पैसे आणि 15 रुपये 14 पैसे प्रती लिटर कर आकारात होते. मार्च आणि मे 2020 मध्ये केंद्राने पेट्रोल आणि डिझेलच्या अबकारी दरात अनुक्रमे 13 आणि 16 रुपये अशी वाढ केली होती.

काल केंद्र सरकारने पेट्रोल-डिझेलचे भाव कमी केल्यानंतर आज राज्य सरकारने पुन्हा एक दिलासा दिलेला आहे. त्यामुळे सर्वसामान्य नागरिकांना निश्चितच ही बातमी सुखद आहे.