पुणे आणि अहमदनगर जिल्ह्याच्या सीमेवरील शिरूर मतदारसंघ सध्या राष्ट्रवादी काँग्रेस पार्टीच्या शरद पवार गटाकडे आहे. अमोल कोल्हे हे शिरूरचे खासदार आहेत. परंतु, शिवसेनेचा ठाकरे गट या मतदारसंघासाठी अग्रही असल्याचं बोललं जात आहे. यासंदर्भात शिवसेनेच्या ठाकरे गटाचे विधान परिषदेचे आमदार सचिन अहिर यांनी काही वेळापूर्वी एबीपी माझाशी बातचित केली. यावेळी सचिन अहिर यांनी सांगितलं की शिरूरबाबत आमच्या कार्यकर्त्यांच्या अपेक्षा आहेत.

हेही वाचा ” …पवारांच्या गडावर काँग्रेसचा डोळा; पृथ्वीराज चव्हाण ‘या’ मतदारसंघासाठी आक्रमक”

शिरूर मतदारसंघासाठी शिवसेनेचा ठाकरे गट अग्रही असल्याचं बोललं जात आहे. त्याबद्दल काय सांगाल असा प्रश्न विचारल्यावर सचिन अहिर म्हणाले, कार्यकर्त्यांची तशी भावना आहे. शिरूरमध्ये आम्ही याआधी लढलो होतो. लोकसभेत विद्यमान खासदार हे राष्ट्रवादी काँग्रेस पार्टीच्या शरद पवार गटाचे आहेत. ते सध्या तिथले विद्यमान खासदार आहेत. परंतु तिथल्या आमच्या कार्यकर्त्यांच्या अपेक्षा आहेत.

सचिन अहिर म्हणाले, पुण्यातील कसबा मतदारसंघात आम्ही काँग्रेसला मदत केली होती. मग यावेळी त्यांनी आमच्याबाबत विचार का करू नये? बाजूचा मतदारसंघ मावळमध्ये आमचा निवडून आलेला खासदार आहे. मी सांगितल्याप्रमाणे ही काही मागणी करण्यासाठी बैठक (ठाकरे गटाची बैठक) नाही. ही संघटनात्मक बैठक आहे.