संभाजी भिडेंच्या मुद्द्यावर देवेंद्र फडणवीस यांनी विधानसभेत निवेदन केलं. फडणवीस म्हणाले, अमरावतीतल्या भाषणाप्रकरणी संभाजी भिडे यांच्यावरील कारवाईला सुरुवात झाली आहे. संभाजी भिडे गुरुजींना सीआरपीसीच्या कलम ४१ अ अंतर्गत नोटीस पाठवण्यात आली आहे. तसेच पोलिसांनी त्यांच्याशी संपर्क साधला आहे. संभाजी भिडे यांनी नोटीस स्वीकारली आहे. याप्रकरणी त्यांची चौकशी होईल.

हेही वाचा” …वेस्टइंडीज विरुद्धच्या पराभवानंतर भारतीय दिग्गजाचा सवाल; म्हणाला…”

देवेंद्र फडणवीस यांनी सांगितलं, संभाजी भिडे यांच्या अमरावतीतल्या सभेचा व्हिडीओ उपलब्ध नाही. समाजमाध्यमांवर जे व्हिडीओ फिरत आहेत, त्याचे व्हॉईस सॅम्पल्स तपासले जातील आणि याप्रकरणी कारवाई होईल.

दरम्यान, संभाजी भिडे यांच्याबद्दल विधानसभेत निवेदन देत असताना देवेंद्र फडणवीस हे सतत संभाजी भिडे गुरुजी असा उल्लेख करत होते. यावर विरोधकांनी आक्षेप घेतला. विरोधी बाकावरील आमदार फडणवीसांना म्हणाले, तुम्ही त्यांना गुरुजी का म्हणता? त्यावर देवेंद्र फडणवीस म्हणाले, कारण, आम्हाला ते गुरुजी वाटतात. तुम्हाला काय अडचण आहे? त्यांचं नाव भिडे गुरुजी आहे.