झाडीपट्टी नाटकाची धमाल दाखवणाऱ्या झॉलीवूड चित्रपटाचा ट्रेलर सोशल मीडियाद्वारे लाँच करण्यात आला. बऱ्याच राष्ट्रीय-आंतररष्ट्रीय महोत्सवात गौरवलेला, पुरस्कारप्राप्त ‘झॉलीवूड’ हा चित्रपट ३ जून रोजी प्रदर्शित होत असून, पहिल्यांदाच झाडीपट्टी नाटकाचं खरंखुरं चित्रण या चित्रपटातून मांडण्यात आलं आहे.

नागराज मंजुळेसारख्या मान्यवर दिग्दर्शकाने चित्रपटाला शुभेच्छा दिल्या आहेत. नागराज मंजुळे यांनी पोस्ट शेअर करत लिहिले की, “झॉलीवूड घेऊन येतोय.. अस्सल मातीतला सिनेमा. झाडीपट्टी हा विषय भारतीय सिनेमासाठी नवीन आहे. अतिशय कष्टातून आणि जिद्दीनं त्यांनी हा सिनेमा पूर्ण केला आहे, 3 जूनला झॉलीवूड सगळीकडे प्रदर्शित होत आहे. तृषांत तुला तुझ्या पहिल्या सिनेमासाठी खूप सदिच्छा!”

 

View this post on Instagram

 

A post shared by Nagraj Popatrao Manjule (@nagraj_manjule)

हा चित्रपट नव्या दमाचा दिग्दर्शक तृषांत इंगळेनं दिग्दर्शित केला आहे. तृषांत या चित्रपटातून दिग्दर्शक म्हणून पदार्पण करत आहे. झाडीपट्टी नाटकांची विदर्भात प्रचंड लोकप्रियता आहे, त्या भागात झाडीपट्टी ही जणू स्वतंत्र इंडस्ट्रीच आहे. पण उर्वरित महाराष्ट्रात झाडीपट्टीविषयी फारशी माहिती नाही. त्यामुळे ‘झॉलीवूड’मधून पहिल्यांदाच झाडीपट्टी चित्रपटाच्या रुपात जगभरात पोहोचणार आहे. झॉलीवूड हा चित्रपट बऱ्याच राष्ट्रीय आणि आंतरराष्ट्रीय महोत्सवांमध्ये दाखवला गेला आहे. राज्य पुरस्कारांमध्येही या चित्रपटानं नामांकनं मिळवली आहेत. आता ३ जूनला चित्रपट प्रदर्शित होण्याची प्रतीक्षी आहे.