पुणे पोलिसांच्या My Pune Safe ॲपसह बदली सॉफ्टवेअरचे अजित पवार यांच्या हस्ते उद्घाटन

टिओडी मराठी,पुणे, दि. 12 जून 2021 – पुणे शहर पोलीस आयुक्तालयाच्यावतीने तयार केलेल्या ‘माय पुणे सेफ’ ॲप आणि बदली सॉफ्टवेअरचे उद्घाटन उपमुख्यमंत्री तथा पुणे जिल्ह्याचे पालकमंत्री अजित पवार यांच्या हस्ते करण्यात आले.

पुणे शहरातील नागरिकांसाठी तसेच कोणत्याही घडलेल्या घटनेच्या ठिकाणी पोलीसांची तात्काळ सेवा उपलब्ध होण्यासाठी पोलीस आयुक्त पुणे शहर यांचे संकल्पनेतून पुणे शहर आयुक्तालयातील पोलीस स्टेशन कडील बिट मार्शल यांचे दैनिक गस्तीसाठी “माय सेफ पुणे” ॲप तयार केले आहे.

या ॲपच्या सहाय्याने पोलीस स्टेशनकडील बिट मार्शल हे हद्दीत पेट्रोलिंग दरम्यान एखाद्या घडणाऱ्या गुन्ह्यास प्रतिबंध होण्याकरीता महत्‍त्वाचे ठिकाणी भेटी देऊन किंवा कोणत्याही घडलेल्या घटनेच्या ठिकाणी भेट देऊन त्या ठिकाणी सेल्फी फोटो काढून माय सेफ पुणे ॲपमध्ये अपलोड केल्यास घटनेच्या ठिकाणाचे अक्षांश, रेखांश आणि वेळ याची नोंद होते.

ॲपवरुन पोलीस नियंत्रण कक्ष पुणे शहर यांना संबंधित बिट मार्शल कोणत्या भागामध्ये गस्तीवर आहे याची माहिती मिळते. बिट मार्शलने कोणत्या वेळी कोणत्या ठिकाणी भेट दिली, याची सर्व माहिती कायमस्वरुपी ॲप मध्ये उपलब्ध राहते.

हे ॲप परिमंडळ 4 चे पोलीस उप आयुक्त पंकज देशमुख यांच्या मार्गदर्शनाखाली परिमंडळ कार्यक्षेत्रात यशस्वीरित्या राबविले आहे.

बदली सॉफ्टवेअरच्या मदतीने पुणे शहर पोलीस दलातील अधिकारी आणि कर्मचाऱ्यांना प्रशासकीयदृष्ट्या परंतु पारदर्शकपणे मनासारखी बदली मिळण्यास मदत होणार आहे.

या ॲपमध्ये पोलीस अधिकारी आणि कर्मचाऱ्यांचे नाव, पदनाम, त्यांचा कार्यकाळ इत्यादीबाबींची नोंद असणार आहे. पोलीस स्थानकात समान पोलीस कर्मचाऱ्याचे बदलीने वाटप करण्यास मदत होणार आहे.

यावेळी या सॉफ्टवेटरचे पोलीस उपायुक्त स्वप्ना गोरे यांनी सादरीकरण करुन कार्यपद्धतीबाबतची माहिती दिली आहे.

Please follow and like us: